Akan tetapi sampai kini alun ado berita sejarah nan terperinci mengenai kerajaan Minangkabau kuno, banyak pertanyaan nan alun terjawab tentang: Bilo Minangkabau Muncul di sumatera? Siapo pendirinyo siapo Rajo-rajo nyo sampai dimano talukanyo? ba a bantuak pemerintahanyo?
Kalau kito batanyo kapado para ahli sejarah, apo sebab keterangan tentang Nagari kami kalam seakan-akan kami ko ndak pernah ado dahulunyo tuan?
Mako spontan mereka akan menjawab: Karano nagari angku indak maninggakan bukti-bukti ilmiah sebagai bahan penyelidikan sejarah.
Memang, memang Minangkabau sangat minim dengan prasasti dan nan paliang parah kito indak punyo tulisan seperti halnyo suku Jawa, Batak, Lampung dan Bugis nan mencatat perjalanan sejarah Nagarinyo.
Untuang sajolah ado sebuah candi batulisan Jawa kuno di Sungai Lansek, nan menerangkan kedatangan Adityawarman ka tanah minang. kini candi itu diletakan di museum Nasional Jakarta, hanyo itulah nan bajaso maninggakan bukti bahwa Minangkabau pernah Jaya pado abad ka 14 M, tapi sesudah itu hilang dan lenyap pulo caritonyo sampai kemudian urang Eropa masuak ka Sumatera Barat.
Tapi sabananyo Minangkabau punyo sumber sejarah nan bisa di pertanggungjawabkan, sumber nan tak kalah nilainyo dari satumpuak candi-candi, prasasti atau tulisan-tulisan purbakala. Yaitu, Tambo dan Kaba.
Tapi sebelum kito bahas lebih lanjut, mungkin para ahli sejarah akan membantah bahwa pandapek itu indak masuak akal, ngawur atau asal sabuik. Sebab ba a dek mako baitu? karano Tambo dan Kaba tak lain dari kumpulan curito-curito legenda, atau setidak-tidaknyo menurut salah satu buku bahwa Tambo berisi 98% dongeng dan hanyo 2% sejarah.
Mako kesimpulanyo, Para sejarawan dan budayawan sapandapek menetapkan pado dasarnyo Tambo merupokan hikayat-hikayat dari zaman antah barantah, antah iyo antah indak tapi banyak bohongnyo.
Mereka beri Contoh bukti nan indak masuak akal dari tambo yaitu, dicuritokan dalam tambo bahwa niniak moyang urang Minangkabau adolah datuak Maharajo Dirajo, beliau adiak bungsu dari batigo badunsanak, kakaknyo nan tangah Maharajo Dipang nan turun ka banuo Cino, nan tuo bagala Maharajo Alif asal muasalnyo dari bangso Rum, ayah mereka adolah Rajo iskandar zulkarnaen bin Zihis Alaihisalam nan di kawinkan jo bidadari dalam sarugo tujuah pangkek, sedangkan Zihis Alaihisalam ko adolah salah seorang anak Adam nan kurang asuhan ampek puluah. Baitu kisah dalam tambo.
Jadi karano itu kini timbul pertanyaan dari mereka. Bilo urang minang kenal jo Nabi Adam?Dimanyo tau kalau di sarugo ado bidadari?
Darima datangnyo kato Alif sebagai huruf awal dari abjad Arab? sudah pasti informasi sarupo iko mereka tarimo dari pelajaran agamo Islam, artinyo tambo itu disusun urang sasudah Islam masuak ka Minangkabau, baru kiro-kiro 500 tahun nan lalu, tapi sebelum itu?
Kemudian mereka lanjutkan, nampaknyo Tambo ingin mangatokan bahwa urang Minangkabau adolah Bangsa super Bangsa terpandang di dunia, sebab di zaman dulu dunia pernah diperintah oleh duo kekuatan Adikuasa, yaitu Roma di barat dan Tiongkok di timur dan kekuatan katigo adolah Minangkabau di pulau panco, duduak samo randah tagak samo tinggi satingkek sederajat jo bangsa-bangsa maju di dunia.
Bukti lain dalam tambo nan ndak masuak aka menurut mereka yaitu, adopun datuak Maharajo Dirajo baranak sepasang bak anak Balam, nan laki-laki banamo datuak Suridirajo nan padusi banamo Puti Endah Julito.
Endah Julito kawin jo Rajo Mauliwarman Dewa, dapeklah anak bagala Datuak Katumangguangan, kemudian putri rajo ko di kawinkan pulo jo Cati Bilang pandai, layialah anak baranam, nan tuo bagala datuak Parpatiah Nansabatang.
Jadi Dt. Katumangguangan dan Dt. Parpatiah Nansabatang adolah cucu lansung dari Dt. Maharajo Dirajo, sedangkan Dt. Maharajo Dirajo ko putra Iskandar Zulkarnaen cucu Zihis Alaihisalam, karano Zihis Alaihisalam putra Adam nan ka 39 mako kaduo Rajo Minangkabau Dt. Katumamgguangan dan Dt. Parpatiah Nansabatang adolah generasi ka limo sasudah Nabi Adam, Manusia Pertama di dunia.
Sedangkan sejarah mencatat bahwa Dt. Katumangguangan dan Dt. Parpatiah Nansabatang sadang mamarentah wakatu Adityawarman manonton kerajaan Minangkabau, terjadinyo pado tahun 1334 M, caliak sejarah Nasional karangan Mr. Mohammad Yamin.
Oleh sebab itu, nyatolah bahwa urang nan manyusun Tambo adolah nan tak tau mamparetongkan waktu, urang nan picayo tambo lah diota dek urang maso saisuak.
Tapi tunggu dulu, tunggu kito berang atau manakua manahan malu, itu kan baru Analisa. Untuak meyakini suatu pendapat kito musti mambandiang dan mauji sampai dimano kebenaranyo, kok putiah tahan sasah kok itam tahan tapo.
Kito punyo hak mambuek analisa diateh analisa, biarpun indak sependapat asalkan argumentasinyo di tunjang data nan bisa di pertanggung jawabkan secaro ilmiah.
Memang, Memang kalau dicaliak kapado tokoh-tokoh nan disabuik dalam tambo dihubungkan pulo jo kurun waktu kejadian nampak sekali ketidakwajaran bahkan kacau balau.
ba a kalau disingguangnyo pulo tentang perahu nan terdampar di puncak Gunuang Merapi, Gunuang nan tingginyo hampir 4 ribu meter diateh permukaan laut? tidak mungkin dan itu bohong besar kato mereka.
Mereka itu betul, dikatokan betul karano urang hanyo mambaco nan Tasurek dalam tambo tapi tidak arif jo nan Tasirek, nah disiko bana kanainyo. Walaupun kito alun dapek manunjuakkan kepastianyo namun membohongkan seluruh isi tambo atau 98% curito khayal, alun dapek kito tarimo.
Sebab siapopun tau bahwa tambo adolah hasil karya sastra tertua di Minangkabau, tambo merupakan kisah nan di wariskan dari generasi ke generasi melalui penuturan lisan, sesuai dengan perkembangan mako gaya bahasa penyampaianyo dan fersi curitonyo mengalami perubahan-perubahan, namun bobotnyo tetap. Sesudah urang minang mengenal tulisan Arab Melayu barulah di bukukan.
Mako seharusnyo kalau nak mandanga atau mambaco Tambo musti tau jo bahaso tambo, seperti halnyo jo mempelajari Al Qur'an musti tau jo bahaso Arab, paham jo nahwu sharaf, menguasai ilmu bayan, mantiq dan mani'.
Baitu juo kalau mampalajari tambo harus paham jo bahaso minang kuno, bisa mauraikan rumus-rumus dan kode-kode nan terselubung nan penuh teka-teki, tanpa itu omong kosong sama sekali.
Pembenaran kato nan dipakai dalam tambo adolah kato-kato klasik, sifatnyo semu atau dikatokan juo kato klise, kato bayang atau kato bamisal. Kalimatnyo kalimat bersayap dengan seribu Makna.
Mako tanpa menterjemahkan dan kemudian mentafsirkan menurut pengertian nan di isyaratkanyo maka tambo hanyolah buah khayal dari manusia.
Nan bak peribahasa urang minang "Usah diharok ka nampak putiak dalam bungo kalau bukan mato batin nan bamain", untuk itu dibutuhkan kearifan dalam mempelajari tambo, kakehkan nan talamun kambangan nan talipek dan baco nan tasirek, sebab isinyo kalau dibalum sabalun kuku jikok dikambamg saleba alam.
Patuik pulo kito pertanyakan kini:
Apakah nan dimaksud dengan keturunan Iskandar Zulkarnaen adolah anaknyo sacaro biologis?
Apo ndak mungkin Bidadari hanyo sebagagai fisualisasi dari putri tercantik umpamonyo?
Atau sarugo sebagai lambang kehidupan gelamor penuh kemewahan?
Apo ndak bisa dijangkau pengertian Gunuang sagadang talua itiak mengisyaratkan urang nan datang dari jauah ?
lai kamungkin kato-kato mangirok ka ateh langik menyatukan bundo kanduang tabang ka udaro, ba a kalau diartikan sebagai evakuasi, mengungsi atau pindah barangkali?
Atau gala bungkukak kapado Rajo Tiang Bungkuak sebagai lambang urang nan tak jujur?
Mako sederet pertanyaan nan alun terjawab tentang bagaimana, siapa, kapan, dimana dan lain sebagainyo, kito lah nan akan mempelajarinyo dan menjawabnyo.
Usah dinantikan urang lain ka mambukakan kunci kapuak awak, sebab mereka hanyo mamandang nan nampak mambaco nan tasurek dan akhirnyo basuo kato indak jo kato antah, mako carilah kato nan iyo atau kato nan indak, katokan kato nan boneh bangkikkan batang tarandam jan sampai lapuak dalam lunau, ditinggakan mamak karangko di kamanakan kayamlah pandan nan baturiah sudahkan bangkalai mamak itulah tugas Generasi kito.
Kebudayaan adolah produk dari prilaku dan sikap mental masyarakat suatu daerah, dan seni sastra nan tertuang dalam tambo, dalam kaba atau dilukis di bait-bait pantun, pepatah, bidal, sya'ir dan ungkapan merupakan cerminan dari perwatakan urang Minangkabau.
Sesuai dengan kepribadianyo, urang minang jarang menyatakan sesuatu secaro gamlang, secaro terbuka atau to the point. Mungkin urang awak tidak praktis, tapi nan pasti urang-urang Minang adolah urang idealis, urang kayo dengan imajinasi nan mautamokan raso, sahinggo malu dan tenggang manenggang dijadikan standar moral, inyo mengukur sesuatu nan nampak dengan nan tidak nampak, di siko urek budi tertanamnyo. Artinyo pribadi urang minang itu tertutup, karano makin jauah talampoknyo sesuatu makin tinggi nilainyo dan naluri manusia ingin mancari nan tasuruak itu.
Dalam bamain kato, bertata laku, pola berfikir dan apo sajo aktifitasnyo urang awak cenderung mencontoh kapado alam, contohnyo dalam batutua mangatakon hitam disabuiknyo baro, putiah dimisalkanyo tapuang, ampadu artinyo paik dan tangguli biduak nan manih. Kalau inyo ingin memgungkapkan perasaanyo disalurkanyo lewat pantun, bait-bait pendek mampu bacurito banyak tentang apo sajo, tapi hanyo urang nan arif nan bisa paham sebab maknanya tasimpan jauah dalam misal jo umpamo, itulah nan dimaksud dengan jikok dikambang saleba alam jikok dibalun sabalun kuku.
Foto: Dokumen Pribadi
Dikutip dari: Kepribadian Minang.mp3